దోమల నివారణా మందు పిచికారికి సహకరించాలి...డిఎంఓ తులసి.

డుంబ్రిగుడ, జూలై 25: ఇళ్లలో దోమల నివారణ మందు పిచికారీకి సహకరించాలని జిల్లా మలేరియా అధికారిణి తులసి కోరారు. మండలంలోని గుంటసీమ సచివాలయ పరిధి సోబురు, రంగిలిసింగి గ్రామాల్లో దోమల మందు రెండో విడత పిచికారీ పనులను ఆమె శుక్రవారం పరిశీలించారు. మలేరియా ప్రభావిత గ్రామాల్లో ముందుగానే పిచికారీ పనులను చేపట్టినట్లు తెలిపారు. ఇళ్ల పరిసరాల్లో నిరుపయోగంగా ఉండే పనికి రాని వస్తువులు, నీటి టొట్టెలు, పూల కుండీలు, డ్రమ్ముల్లో నీటి నిల్వ ఉండకుండా చూడాలని సూచించారు. దోమతెరలు వాడాలని గ్రామస్థులకు సూచించారు. వైద్య సిబ్బంది విధుల్లో నిర్లక్ష్యం వహిస్తే చర్యలు తీసుకుంటామని ఆమె హెచ్చరించారు. ఈ కార్యక్రమంలో ఏఎంపీవో ధనుంజయ్, జిల్లా పీహెచ్ఈఓ సుబ్రహ్మణ్యం, అరకు సబ్ యూనిట్ సిబ్బందితోపాటు ఏఎన్‌ఎం సుబ్బులక్ష్మి తదితరులు పాల్గొన్నారు. – AP Voice Today